Улаанбаатарын зам талбайн цэвэрлэгээ хариуцдаг 18 байгууллага зориулалтын давс, бодис цацалтын ажлыг цас орохтой зэрэгцэн эхлүүлжээ.
Өчигдөрийн 15:00 цагийн байдлаар зам дээр 71 тонн бодис, 161 тонн давс цацсан бол Улаанбаатар хотын Захирагчийн ажлын албанаас цас цэвэрлэгээг хийсэн байна.
Зам талбайд 18 байгууллагын 72 машин техниктэйгээр ТҮК-ийн 878 ажилтан 13.2 сая м.кв талбайн цасыг цэвэрлэжээ.
Хуульд зааснаар аж ахуйн нэгж, байгууллагын орчны 50 метр хүртэлх нийтийн эдэлбэр газрын хог хаягдал, цас мөсийг тухайн аж ахуйн нэгж цэвэрлэх үүрэгтэй. Иймд нийслэлийн иргэд, аж ахуйн нэгжүүд орчныхоо 50 метрийн цас, мөсний цэвэрлэгээг хийж, зам талбайн үйлчлэгч нарт дэм болохыг Хотын захирагчийн ажлын албанаас уриаллаа.
