Словенийн тамирчин Домен Превц ням гарагт 254.5 метрийн харайлт хийснээр трамплин харайлтын дэлхийн шинэ дээд амжилтыг тогтоолоо. Уг амжилт нь Словенид болсон цанын харайлтын дэлхийн цомын тэмцээний хоёрдугаар шатны үеэр бүртгэгдсэн бөгөөд тэрбээр хоёр бүтэн, нэг хагас хөлбөмбөгийн талбайтай тэнцэх уртад харайсан байна.

Ингэснээр 2017 онд Австрийн Стефан Крафтын тогтоосон 253.5 метрийн дээд амжилтыг нэг метрээр ахиулсан ч Д.Превц тэмцээний нийт онооны нийлбэрээр хоёрдугаар байрт оржээ. Түүний нутаг нэгт тамирчин Анже Ланишек 482.1 оноогоор түрүүлсэн бол Превц 475 оноо авсан байна.

Домен Превц өөрийн Instagram хуудсаар дамжуулан "Энэ бол Холливүүдийн найруулагчдын ч төсөөлөлд багтамгүй хамгийн сайхан түүх байлаа. Энэхүү түүхийг хамтдаа бүтээж, мартагдашгүй улирлыг бэлэглэсэн та бүхэнд баярлалаа!" хэмээн сэтгэгдлээ хуваалцжээ.

Тэрбээр энэ сарын эхээр Австрийн Тронхейм хотод болсон ДАШТ-ээс ларж-хилл төрөлд аваргалж, багийн төрөлд алтан медаль, холимог багийн төрөлд мөнгөн медаль хүртсэн юм.

Харин өнгөрсөн жил Японы Рёюү Кобаяши байгалийн тусгай тавцангаас 291 метр харайсан ч Олон улсын цана, сноубордын холбоо (FIS) түүнийг албан ёсны дээд амжилтаар бүртгээгүй байна.

Эх сурвалж: CNN.