УИХ-ын гишүүн Ж.Ганбаатар намрын чуулганы хугацааг сунгах болон УИХ-ын даргын томилгооны талаар сэтгүүлчдийн асуултад хариулж,  байр сууриа илэрхийлжээ.

-Намрын чуулганыг цагаан сарын өмнө хаана гэсэн байр суурьтай гишүүд танай нам дотор олон байх шиг байна. Таны байр суурь юу вэ? 

-УИХ-ын намрын чуулган 40 гишүүний "бойкот"-оос болоод сар гаруй гацлаа шүү дээ. Үүнийгээ нөхөж хуралдах ёстой. Цагаан сарын үеэр амарна биз. Дараа нь ээлжит бус чуулган зарлаад гацсан хуулиудаа, асуудлаа цааш нь явуулах ёстой.

-УИХ-ын дараагийн даргыг ямар хүн байгаасай гэж та бодож байна?

-Хамгийн гол нь УИХ-д олон удаа сонгогдсон туршлагатай хүн байгаасай л гэж бодож байна.

-Татварын багц хууль одоо УИХ дээр ороод ирчихсэн байгаа. Та хуулийн төсөлтэй танилцсан уу? Ямар байр суурьтай байна?

-Хуулийн төсөл хэлэлцүүлэгт ороод яваад эхэлчихвэл өөрийн байр сууриа илэрхийлнэ. Гэвч Байнгын хороо хуралдахгүй байна. Ирц хүрэхгүй байна. Гишүүдийн ихэнх нь тойрогт томилолттой байна.