Жил бүрийн арванхоёрдугаар сарын 29-ний өдрийг Их эзэн Чингис хааны мэндэлсэн өдөр болгон тэмдэглэдэг уламжлалтай.
Энэ өдөр Монгол Улсын Ерөнхийлөгч Х.Баттулга Төрийн соёрхол шагнал гардуулж, Чингисийн хөшөөнд хүндэтгэл үзүүлнэ. Мөн Үндэсний эрх чөлөө, тусгаар тогтнолоо сэргээн мандуулсны 107 жилийн ойд зориулсан, Ерөнхийлөгчийн цомын нэрэмжит чансаа өндөр 128 бөхийн барилдаан "Буянт-Ухаа" спортын ордонд болно.
Монголын үндэсний бөхийн холбоо /МҮБХ/-нд үүссэн маргаан нэг мөр цэгцэрч, Бөхийн өргөө хэвийн үйл ажиллагаагаа явуулхаар болсон. МҮБХ-ны шинэ тэргүүн, УИХ-ын гишүүн Б.Бат-Эрдэнэ, Дархан аварга, Хөдөлмөрийн баатар Х.Баянмөнх нар уулзаж, бөхчүүдийн түр зөвлөлийг байгуулан хамтран ажиллахаар тохиролцсон. Харин Бөхийн өргөөг нээж, бөхөө, үзэгчээ авахад бэлэн болоогүй байгаа аж.
Үндэсний эрх чөлөө, тусгаар тогтнолоо сэргээн мандуулсны 107 жилийн ойд зориулсан, Ерөнхийлөгчийн цомын нэрэмжит үндэсний бөхийн барилдааныг энэ удаад Буянт-Ухаа спортын ордонд хийхээр тов нь эрт гарч билетээ зарсан. Харин Цагаан сарын барилдаан Бөхийн өргөөнд болох магадлалтай.
МҮБХ-ны шинэ тэргүүн, УИХ-ын гишүүн Б.Бат-Эрдэнэ "Энэ жилийн арванхоёрдугаар сарын 29-ний барилдааныг Нисэхэд байрлах Спортын ордонд зохион байгуулахаар Ерөнхийлөгчийн тамгын газартай тохиролцчихсон. Ер нь олон үзэгчтэй томоохон барилдаануудыг тэнд зохион байгуулах тохиолдол байж болно" хэмээн хэлж байсан юм.
