Антарктидаас Японы судлаачдын багийн олж илрүүлсэн “Ангараг гаргийн чулууг” 2025 онд Осака хотод болох “Дэлхийн Экспо” үзэсгэлэнгийн үеэр анх удаа олон нийтэд үзүүлнэ гэж тус улсын засгийн газраас өнөөдөр мэдэгдлээ.
Уг солирыг Японы Туйлын судалгааны үндэсний хүрээлэнгийн судлаачид 2000 онд олсон бөгөөд Ангараг гаргийн гадаргууг астероид мөргөсний улмаас сансарт шидэгдсэн болохыг тогтоожээ. Нийт 29 см урт, 22 см өргөн, 16 см өндөр, 13 кг жинтэй энэ солир нь Дэлхий дээрээс олдсон хамгийн том солируудын нэг юм. Солирын дотор агуулагдаж байсан хийг шинжилснээр гарал үүслийг нь тогтоосон байна.
Эл чулуунд устай урвалд ордог эрдэс бодисууд агуулагдаж байсан нь Ангараг гараг дээр урьд өмнө ус байсныг харуулж байгаа бөгөөд амьдралын үүслийн талаар ойлголттой болоход тус дөхөм болж магадгүй байна. Японы Засгийн газар солирыг Экспогийн урианд нийцэж байна гэж үзээд үзмэрийн тоонд оруулахаар шийдвэрлэжээ.
1970 оны “Осака Экспо”-гийн үеэр “Аполло 11” сансрын хөлгөөр авчирсан Сарны чулууг олон нийтэд дэлгэн үзүүлсэн нь үзэгчдийн сонирхлыг ихээхэн татаж байлаа. Засгийн газар ирэх дөрөвдүгээр сард эхлэх экспогийн үеэр уг чулууг дахин нэг удаа үзүүлэхийг АНУ-ын талаас хүссэн байна.
