Авлигатай тэмцэх газраас энэ сарын 21-ны өдөр "Голомт" банкны үүсгэн байгуулагчдын нэг Д.Баясгаланг хойшлуулшгүй ажиллагаа явуулан баривчлан саатуулсан. Үүнээс 48 цагийн дараа буюу нэгдүгээр сарын 23-нд Нийслэлийн прокурорын газраас шүүхээс Д.Баясгаланг нэг сарын хугацаагаар цагдан хорих санал гаргаж Хан-Уул дүүргийн эрүүгийн хэргийн анхан шатны шүүх үргэлжлүүлэн хорих шийдвэр гаргасан. Тэгвэл өнөөдөр Д.Баясгалангийн өмгөөлөгч Б.Баяраа нь 2019.01.23-ны өдрийн 26 тоот Шүүгчийн захирамжийг хүчингүй болгуулахаар гомдол гаргасныг шүүх хангажээ.

Өөрөөр хэлбэл шүүхээс Д.Баясгаланг үргэлжлүүлэх хорих шаардлагагүй гэж үзсэн байна. Тиймээс өнөөдөр тэрээр суллагдах нь.    

Түүнийг Улсын Ерөнхий прокурор асан Д.Дорлигжавтай холбоотой хэрэг холбогдуулан саатуулан баривчилсан байх гэсэн мэдээлэл гарсан. "Алтандорнод Монгол" компанийн захирал Т.Ганболд телевизэд өгсөн ярилцлагадаа Ерөнхий прокурор асан Д.Дорлигжавт авлига болгон 4 сая ам.доллар өгсөн гэсэн бол Д.Дорлигжав үүнийг үгүйсгэж, "Энэ бол гүтгэлэг. Голомт банк данс андууран 2 сая ам.доллар шилжүүлсэн" хэмээн тайлбарлах, нотлох баримт болгон "Голомт" банкнаас ирүүлсэн тайлбарыг үзүүлсэн билээ.