Венесуэлийн одоогийн Засгийн газрыг эсэргүүцэгчид эсэргүүцлийн ажиллагаагаа лхагва гаригт үргэлжлүүлнэ гэдгийг тус улсын сөрөг хүчний удирдагч Хуан Гуайдо өчигдөр мэдэгджээ. Тэрбээр ийм мэдэгдэл хийсэн дүрс бичлэгээ өөрийн “Twitter” хуудсандаа байрлуулсан байна.
“Тавдугаар сарын 1-нд бид тэмцлээ үргэлжлүүлнэ” гэж Гуайдо мэдэгдээд, мягмар гаригт болсон эсэргүүцлийн ажиллагаанд цэргийнхэн оролцсон нь “Зэвсэгт хүчин Ерөнхийлөгч Мадурог дэмждэггүй, хүндэлдэггүй” гэдгийг харууллаа гэж онцлон хэлжээ.
Венесуэлийн “Засгийн эрхийг булаан авсныг эцэс болгохын тулд” жагсахыг цэргийнхэнд уриалсан дүрс бичлэгийг Гуайдо мягмар гаригт “Twitter” хуудсандаа нийтэлсэн юм. Түүний хэлснээр, дүрс бичлэгийг Каракас хот дахь Франсиско Мирандагийн нэрэмжит нисэх хүчний баазын нутаг дэвсгэрт авсан байна.
Үүний дараа Венесуэлийн нийслэл хот болон бусад хотод Засгийн газрыг эсэргүүцсэн жагсаал болсон байна. Эсэргүүцлийн ажиллагааны үеэр 25 хүнийг баривчилсан тухай “Венесуэлийн эрүүгийн форум” төрийн бус байгууллага мэдээлжээ.
