Боловсролын сайд П.Наранбаяр Их Британи, Умард Ирландын Нэгдсэн Хаант Улсаас Монгол Улсад суугаа Онц бөгөөд Бүрэн эрхт Элчин сайд Фиона Блайт, Монгол дахь НҮБ-ын Хүүхдийн сангийн Шадар суурин төлөөлөгч Ян Му нарыг хүлээн авч уулзлаа.
Уулзалтаар ерөнхий боловсролын сургуулийн англи хэлний багш нарыг бэлтгэх, чадавхжуулах төсөл хэрэгжүүлэх асуудлаар санал солилцов. Тус төсөл нь Их Британи, Умард Ирландын Нэгдсэн Хаант Улсын Гадаад хэрэг, хамтын нөхөрлөл, хөгжлийн сайдын өнгөрсөн онд Монгол Улсад хийсэн албан ёсны айлчлалын үеэр амласан шууд бус санхүүжилттэй хөтөлбөрийн нэг хэсэг юм.
Талууд уг төслийг 2024 оны хоёрдугаар сараас эхлэн хэрэгжүүлэхээр тохиролцож, багш нарыг бэлтгэх, давтан сургах, чадавхжуулах үйл ажиллагааг мэргэжлийн байгууллага хариуцан ажиллах нь зүйтэй гэж үзэв. НҮБ-ын Хүүхдийн сан төслийн хэрэгжилтэд хяналт тавин ажиллахаар болсон талаар Боловсролын сайд П.Наранбаяр онцоллоо.
