Эрүүл мэндийн яамны Төрийн нарийн бичгийн дарга Д.Очирбат тэргүүтэй Монголын төлөөлөгчид 2025 оны дөрөвдүгээр сарын 3-4-ний өдрүүдэд Филиппиний Манила хотноо болж буй Өвчтөний аюулгүй байдлын асуудлаарх дэлхийн сайд нарын 7 дугаар дээд хэмжээний уулзалтад оролцож байна.
Азийн хөгжлийн банкны бүсийн төвд зохион байгуулагдаж буй энэхүү чуулга уулзалтад дэлхийн 30 гаруй улс оролцож, өвчтөний аюулгүй байдлыг хэрхэн сайжруулах, олон улсын сайн туршлагыг хуваалцах, хамтын ажиллагааг эрчимжүүлэх чиглэлд санал солилцож байна. Уулзалтын хүрээнд “Мандалуёнгын тунхаг”-ийг батлахаар төлөвлөсөн бөгөөд энэ нь өвчтөний аюулгүй байдлыг эрхэмлэн, үйлчлүүлэгч төвтэй тусламж үйлчилгээг хөгжүүлэх, удирдлагын манлайлал, тогтолцооны чадавхийг бэхжүүлэхийг уриалж буй уриа бичиг юм.
Монголын эрүүл мэндийн салбарын зүгээс тус чуулганд оролцож буй нь олон улсын туршлагаас суралцах, үндэсний бодлогоо сайжруулахад бодитой хувь нэмэр оруулах зорилготой бөгөөд эрүүл мэндийн үйлчилгээний чанар, өвчтөний аюулгүй байдлыг ахиулахад чиглэсэн олон улсын хамтын ажиллагаанд Монгол Улс идэвхтэй оролцож байгааг харуулж байна.
Эх сурвалж: Эрүүл мэндийн яам.
