Авлигатай тэмцэх газрын Урьдчилан сэргийлэх, соён гэгээрүүлэх хэлтэс 2025 оны нэгдүгээр сарын 20-24-ний өдрүүдэд авлигын эрсдэлийг бууруулах чиглэлээр Үндэсний урлагийн их театр, Чингэлтэй дүүргийн Улсын бүртгэлийн хэлтэст зөвлөмж, Соёл, спорт, аялал жуулчлал, залуучуудын яаманд хуулийн хэрэгжилтийг хангуулах тухай албан бичиг хүргүүллээ.
Мөн авлигын шалтгаан, нөхцөлийг тогтоож, арилгах, үйлдлийг таслан зогсоох зорилгоор дараах байгууллагуудын төсвийн хөрөнгө, зээл тусламжийн зарцуулалт, ил тод байдлыг дүгнэн шинжилжээ. Үүнд:
- Зам тээврийн яам, Эрчим хүчний зохицуулах хороо, Ойн газар, Ашигт малтмал газрын тосны газар, Төрийн худалдан авах ажиллагааны газар, Стандарт, хэмжил зүйн газар, Мал эмнэлгийн ерөнхий газар, Монополын эсрэг газар зэрэг төрийн байгууллагууд,
- Баянзүрх дүүргийн Хөдөлмөр, халамжийн үйлчилгээний хэлтэс, Багануур дүүргийн Нийгмийн даатгалын газар, Цэргийн төв эмнэлэг,
- “Бөртэ”, “Барилгын хөгжлийн төв” ТӨҮГ зэрэг байгууллагууд багтжээ.
Түүнчлэн авлигын эсрэг сургалтад 11 байгууллагын 787 албан тушаалтныг хамруулсан талаар Авлигатай тэмцэх газраас мэдээлэв.
Эх сурвалж: АТГ
