Унгарын нийслэл Будапешт хотноо дэлхийн шатрын 45 дахь олимпиад үргэлжилж байна.

Долоо хоногийн дараа өндөрлөх тус олимпиадад эрэгтэй 197, эмэгтэй 184 улс өрсөлдөж байгаа бөгөөд оролцогчдын тоогоороо дээд амжилт тогтоов. Баг бүр үндсэн дөрөв, нөөц нэг тамирчинтай байх бөгөөд швейцар системээр 11 өрөг тоглож, медальтнуудаа тодруулах юм. Тус тэмцээнд Монголын баг дасгалжуулагч Д.Төрмөнх, Д.Янжиндулам нарын удирдлага дор оролцож байна.

Энэ удаагийн олимпиадад олон улсын мастер Г.Амартүвшин, их мастер Т.Мөнхзул нар нэгдүгээр ширээнд тоглож байгаа юм. Эрэгтэйчүүд 19.4 дундаж настай гэсэн үзүүлэлтээр олимпиадын хамгийн залуу багаар тодорсон. Эрэгтэйчүүд таван өргийн дараа хоёр хожил, хоёр тэнцээ, нэг хожигдолтой яваа. Өчигдөр Суданыг 4:0-ээр буулган авсан бол үүний өмнө хүчирхэг Израйльтай тэнцсэн ч Германыг барсангүй. Тэд өнөөдөр Болгарын шигшээтэй хүч үзнэ.

Тэгвэл эмэгтэйчүүд дэлхийн хүчтэй багуудын нэг Америкийг буулган авснаар тав дахь дараалсан ялалтаа байгууллаа. Энэтхэгийн Чиннайн олимпиадад манай эмэгтэйчүүд 160 гаруй орноос 15-т орж томоохон амжилт үзүүлж байв. Тэд өнөөдөр 44 дүгээр олимпиадын мөнгөн медальт Гүржийн хүчирхэг багтай тоглоно.