Хятад-Малайз гаралтай жүжигчин Мишель Иео Алтан бөмбөрцөг кино наадмаас "Инээдмийн болон хөгжимт киноны шилдэг эмэгтэй жүжигчин" шагналыг хүртлээ.
Өдгөө 60 настай жүжигчин Мишель Иео "Everything everytime all at once" кинонд бүтээсэн дүрээрээ Анна Тэйлор Жой, Маргот Робби, Лесли Манвилл нарыг ардаа орхин, уг наадмаас анхны шагналаа хүртсэн юм. Ингэснээр уг номинацид шилдгээр тодорсон Ази гаралтай хоёр дахь жүжигчин боллоо.
Шагнал хүртэснийхээ дараа Мишель Иео ""Олон жилийн хөдөлмөр, амаргүй тэмцлийн дүнд энд зогсож байна. Би анх Холливуудад ирсэн үеэ тод санадаг. Энд ирнэ гэдэг миний хувьд мөрөөдөл байлаа. Нэг хүн надад "Чи англи хэлтэй юу?" гэж асуухад нь "Ийшээ би 13 цаг нисэж ирсэн. Ирэх замдаа сурчихлаа гэж хэлсэн" хэмээн хошигнов.
Харин түүний амжилтыг биширч, Малайзын Харилцаа холбооны сайд Фахмил Фадзил "Манай улсын хувьд ихээхэн нэр төрийн хэрэ. Дараагийнх нь Оскар" хэмээн твиттертээ жиргэжээ.
Мөн Хонконгийн соёл урлаг хариуцсан нарийн бичгийн дарга Кевин Юнг "Кино урлагийн салбарт Хонконг жүжигчдийн гялалзсан амжилт үргэлжилсээр буй нь бидэнд тун их урам зориг өгч байна" гэжээ.
