Дэлхий дахинаа коронавируст халдварын тохиолдол хоёр саяыг давжээ.
Даваа гаригийн оройны байдлаар “COVID-19” халдвар дэлхийн хэмжээнд 2019320 хүнд халдварлаж, 119483 хүн нас бараад байна.
Шинэ коронавируст халдвар БНХАУ-ын Ухань хотод өнгөрсөн 12 дугаар сард анх дэгдсэнээс хойш дэлхийн бараг бүх улс оронд тархаж, халдварыг хязгаарлахын тулд тогтоосон хөл хорионы арга хэмжээнүүд олон сая хүний өдөр тутмын амьдралд нөлөөлөөд байна.
АНУ-д халдварын хамгийн олон буюу 577 мянга гаруй тохиолдол бүртгэгдэж, 23219 хүн нас баржээ.
Итали, Испани, АНУ зэрэг халдвар хамгийн их тархсан орнуудад вирусийн тархалт саарах хандлага ажиглагдаж байгаа хэдий ч Дэлхийн эрүүл мэндийн байгууллага хязгаарлалтын арга хэмжээнүүдийг хэт эрт цуцлахгүй байхыг анхааруулжээ.
ДЭМБ-ын захирал Тедрос “Хурдацтай тархаж буй “COVID-19” халдварын саарах үйл явц өссөнөөсөө удаан байх болно. Иймээс хязгаарлалтын арга хэмжээнүүдийг аажмаар, хяналттайгаар цуцлах хэрэгтэй” гэж мэдэгдсэн байна.
