Японы Эдийн засаг, худалдаа, аж үйлдвэрийн сайд Сугавара Ишшю сонгогчдын саналыг авлигадаж авсан гэх дуулиан шуугианы улмаас огцорчээ. Энэ тухай Сугавара өөрөө сэтгүүлчдэд мэдээлсэн байна.
Эдийн засгийн сайд асан “Би Ерөнхий сайд Абэ Шинзод огцрох хүсэлтээ өгсөн. Өнөөдөр парламент дахь төсвийн хорооны ажил эхэлж байгаа бөгөөд миний нөхцөл байдлыг хэлэлцэж, тус хорооны ажил удаашрах ёсгүй” гэжээ.
Японы Ерөнхий сайд Абэ Шинзо Сугаварагийн огцрох хүсэлтийг хүлээн авсан гэдгээ сэтгүүлчдэд мэдээлээд, Эдийн засгийн шинэ сайдаар эрх баригч Либерал Ардчилсан намын ахмад гишүүн Кажияма Хироши болно гэж мэдэгджээ. Тэрбээр өмнө нь Японы Газар, дэд бүтэц, тээвэр, аялал жуулчлалын дэд сайдаар ажиллаж байсан байна.
Сонгуулийн кампанит ажлын үеэр Сугаварагийн штаб түүний сонгогдсон нийслэлийн хотын дүүргийн оршин суугчдад оршуулгын ёслолд ашигладаг гуа, хүж, цэцэг зэрэг жижиг бэлгийг өгсөн гэж долоо хоног тутмын "Сюкан Бунсюн" сонин энэ сарын эхээр мэдээлжээ. Сугавара Эдийн засгийн сайдын албыг хашаад сар гаруйхны хугацаа өнгөрч байгаа бөгөөд тэрбээр Ерөнхий сайд Абэ Шинзогийн есдүгээр сарын дундуур хийсэн томоохон халаа сэлгээний дараа энэ албанд томилогдсон юм.
МОНЦАМЭ
