Зөвхөн загварыхан ч биш хүн бүрийн хүсэн хүлээдэг, үзэх дуртай, жинхэнэ хүлээлт үүсгэдэг "Victoriа’s Secret"-ийн шоу Нью-Йорк хотноо арваннэгдүгээр сарын 9-ний өдөр болж өнгөрлөө. Шоуны бүрэн бичлэг арванхоёрдугаар сарын 2-нд ABC сувгаар цацагдах юм.

Энэ удаагийн шоунд Адриана Лима, алдартай сахиусан тэнгэрүүд болон олны хайртай загвар өмсөгчид Кендалл, Жижи, Белла нар оролцож, Fantasy Bra-г Шведийн модель Эльза Хоск танилцуулсан билээ.

Энэ удаагийн "Viсtoriа’s Secret" шоу домогт сахиусан тэнгэр, супер модель Адриана Лимагийн хувьд сүүлчийнх нь болж, 19 жилийн дараа тайзнаас бууж байгаа гэдгээ албан ёсоор мэдэгдсэн юм.

Өдгөө 37 настай Адриана шоу эхлэхээс өмнө өөрийн инстаграм хуудаснаа Victoria's Secret-ийн тайзнаас бууж буйгаа мэдэгдэж, "Хүндэт Виктория, надад дэлхийг харуулсанд, өөрийн нууцаасаа хуваалцсанд мөн надад далавч өгөөд зогсохгүй хэрхэн нисэхийг зааж өгсөнд баярлалаа" хэмээн бичжээ.

Бразилийн супер модель анх Victoria's Secret-ийн загварын тайзнаа 1999 онд алхаж, 2000 онд тус брэндийн сахиусан тэнгэр болж байв. Тэрээр Victoria's Secret-ийн тайзыг хамгийн олон жил "эзэгнэсэн" сахиусан тэнгэр бөгөөд "Fantasy Bra"-г нийт гурван удаа танилцуулж, тус брэндийн хамгийн үнэ цэнэтэй модел байсан юм. 

Ингээд та бүхэндээ 2018 оны "Victoriа’s Secret"-ийн  23 дахь удаагийн шоуны зургаас толилуулж байна. 

Б.Туяа