Арабын Нэгдсэн Эмирт улсын Дубай хотноо Интерполын Ерөнхий Ассамблейн 87 дугаар хуралдааны үеэр Интерпол шинэ тэргүүнээ сонголоо. Интерпол шинэ тэргүүнээр Өмнөд Солонгосын төлөөлөгч Ким Жон Ян сонгогдлоо. Энэ тухай тус байгууллагын хэвлэлийн алба “Twitter” дэх хуудастаа мэдээлжээ. Уг албан тушаалд өмнө нь Хятадын иргэн Мэн Хонвэй сууж байсан ч есдүгээр сард эх орондоо очоод авлигын хэргээр баривчлагдсаны дараа огцорсон юм.
Интерполын тэргүүний албан тушаалд тус байгууллагын дэд ерөнхийлөгч, ОХУ-ын цагдаагийн хошууч генерал Александр Прокопчук нэр дэвшсэн юм. АНУ тэргүүтэй өрнөдийн орнууд хүчтэй эсэргүүцэж, оронд нь Өмнөд Солонгосын нэр дэвшигчийг дэмжсэн байна.
“The Times” сонинд гарсан нийтлэлд Оросын төлөөлөгчийг уг албан тушаалын төлөөх өрсөлдөөнд тэргүүлэгч гэж бичсэн байна. Гэвч Литва болон Украин улс түүнийг сонгохыг эсэргүүцжээ. Тус хоёр орон хэрэв Оросын төлөөлөгч Интерполыг тэргүүлбэл тус байгууллагаас гарна гэж сүрдүүлжээ.
Интерполын захирлыг хоёр жилийн хугацаатай сонгодог аж. Ким Жон Ян 10 дугаар сараас хойш Мэн Хунвэйг огцорсонтой холбоотойгоор тус байгууллагын тэргүүний үүргийг түр гүйцэтгэж байжээ.
