Германы Гадаад хэргийн сайд Хайко "Маас Der Spiegel" сэтгүүлд өгсөн ярилцлагадаа Европт энх тайван байдлыг хадгалах, зэвсэг хураах явцад хяналт тавих дэглэмийг эргэн харахыг санал болгосон байна.

Маасынхаар бол Дунд болон ойрын зайны пуужингийн тухай хэлэлцээрээс татгалзах нь зэвсэг хураах үйл явцын хамгийн том ололтыг устгаж байгаа хэрэг гэнэ. Ийм болохоор Герман улс АНУ-гаас ялгаатай нь европын холбоотнуудтайгаа хамтраад  энэ хэлэлцээрийг аль болох хадгалахын төлөө байна гэж сайд тэмдэглэжээ. “Европт энх тайван байдлаа хадгалъя гэж хүсч байгаа л бол бид зэвсэглэлд болон зэвсэг хураах үйл явцад  хяналт тавих бодлогоо эргэн харах ёстой болж байна” гэж Маас мэдэгджээ.

Олон улсын аюулгүй байдлын төлөө тэрбээр  дөрвөн зүйлийг нэрлэсний дотор “харилцан итгэлцлийн хүрээнд” АНУ, Европ, Оросын хооронд мэдээлэл солилцдог практикт эргэн орох, пуужингийн, ялангуяа далавчит пуужингийн  талаарх мэдээлэлд үнэлгээ шинжилгээ хийж байх, зэвсэглэлд хяналт тавих асуудлаар ил тод байх үүднээс Хятадад шахалт үзүүлэх зэргийг дурдсан байна.

Үүний зэрэгцээ өмнө нь зөвхөн уран сэтгэмж төдий байснаа өнөөдөр дэлхий дахинд “үхлийн бодит зүйл” болж байгаа зэвсэглэлийн салбар дахь шинэ технологийг бүртгэж байх шаардлагатайг ч бас онцолжээ. “Зэвсэглэлд хяналт тавих, зэвсэг хураах асуудлаар бид эрс шийдэмгий ажиллах болно. Тэгэж байж л дэлхий даяраа зэвсэглэлээр хөөцөлдөх явдлыг зогсоож чадна” гэж сайд Маас хэлсэн байна.

Дунд болон ойрын тусгалтай пуужинг устгах тухай 1987 оны арванхоёрдугаар сарын 8-ны хугацаагүй хэлэлцээрээс гарах тухайгаа АНУ-ын ерөнхийлөгч Дональд Трамп аравдугаар сарын эхээр зарласан юм.

Х.Өлзий