Дэлхийн нэгдүгээр дайн төгсгөл болсны 100 жилийн ойн үйл ажиллагаа 11 дүгээр сарын 11-нд болох билээ. Энэ үеээр ОХУ-ын Ерөнхийлөгч Владимир Путин, АНУ-ын Ерөнхийлөгч Дональд Трамптай Парист уулзаж магадгүй байна.
Путин мягмар гаригт АНУ-ын Үндэсний аюулгүй байдлын зөвлөх Жон Болтонтой уулзахдаа энэ тухай ярьжээ.
Владимир Путин: “Өнгөрөгч долоодугаар сард АНУ-ын Ерөнхийлөгчтэй уулзсан уулзалтаа үр дүнтэй яриа болсон. Гэвч энэ уулзалт АНУ-ын улс төрд ямар учраас сөрөг үр дагавар дагуулсныг ойлгоогүй” гэсэн байна.
Үүнээс гадна Владимир Путин АНУ-ын Дундын болон бага тусгалын пуужин устгах олон улсын гэрээнээс гарсны дараа ямар хариу арга хэмжээ авахаа шийднэ хэмээн ярьжээ.
Харин хариуд нь АНУ-ын Үндэсний аюулгүй байдлын зөвлөх Жон Болтон "АНУ-ын Ерөнхийлөгч Доналд Трамп Владимир Путинтэй Парист уулзахыг таатай хүлээн авах байх, мөн Москва, Вашингтон хоёр яриа хэлэлцээгээ үргэлжлүүлэх хэрэгтэй гэдэгт санал нэг байгаагаа илэрхийлжээ.
Цөмийн пуужингийн тухайд тэрбээр Оросын тал 2013 оноос хойш энэ гэрээг зөрчсөн гээд ОХУ-аас гадна бусад улсууд, тэр дундаа БНХАУ цөмийн пуужин хөгжүүлж байгаа гэсэн байна.
