WMT Consult гэх судалгааны агентлаг сая явагдсан хөлбөмбөгийн дэлхийн аваргын тэмцээнээр мөнгө босгосон бизнесменүүдийн жагсаалтыг гаргасан байна.
ДАШТ-нд хотын болон спортын дэд бүтцийг босгоход оролцсон гүйцэтгэгчид ба түншүүдийн дундаас хамгийн их гэрээг Геннадий Тимченкогийн компани авч Доод Новгород, Волгоград хотуудын цэнгэлдэхийг босгожээ. Виктор Вексельбергийн компани Ростов-на-Дону хотын Платовын нисэх буудлыг, Олег Дерипаскийн компани Санкт-Петербургийн цэнгэлдэхийг мөн Шереметьево нисэх буудлын гурав дахь нисэх, буух зурвасыг тус тус босгожээ.
ДАШТ-2018 арга хэмжээ нь Михаил Фридман, Алишер Усманов, Леонид Федун, Аркадий Ротенберг, Дмитрий Каменщик зэргийн нэртэй олигархиадгүйгээр явагдсангүй гэж WMT Consult онцлов.
Компанийн мэдээгээр, тэмцээний зохион байгуулалтын нийт өртөг нь 1,2 их наяд рубль болжээ. Түүнээс 134 тэрбумыг цэнгэлдэхүүдийг байгуулж, засахад, 352,5 тэрбумыг нисэх буудлууд, зам, тээврийн дэд бүтцийн бусад байгууламжуудад зарлагадсан байна. “Хамгийн чухал нь дэд бүтцийн төслүүд зөвхөн Москва ба Санкт-Петербургаар хязгаарлагдсангүй. Мөнгөний нэг хэсэг бүс нутагт очсон байна. Тухайлбал, Саранскийн нисэх буудлын шинэчлэлийг хэлж болно. ДАШТ-гүйгээр тэндхийн нисэх буудал мөд баригдахгүй байв. Платов нь Ростов-на-Доноос холгүй орших ба жилдээ найман сая зорчигчдын дамжин нэвтрүүлэх хүчин чадалтай бөгөөд Оросдоо хамгийн өндөр өртөгтэй нисэх буудал юм. Үнэ хөлс нь хотын хүрээний хуучин нисэх буудлынхаас хоёр дахин өндөр хэмээн судалгаанд өгүүлжээ.
Судалгааг зохиогчид, замын сүлжээний шинэчлэлээс хамгийн их хөрөнгөжилттэй, хамгийн чухал байгууламж нь Крымын гүүрийг нэрлэжээ. Оросын Төв банкны тоолсноор, Оросын 11 хотод явагдсан ДАШТ нь хоёрдугаар улиралд Оросын ДНБ-нд 0,1-0,2 хувийг нэмжээ.
М.Цогт
