АНУ-ын ерөнхийлөгч Д.Трамп өөрийн гаргасан хууль бус цагаачдын хүүхдүүдийг тусгаарлах шийдвэрээ цуцаллаа. Тэрээр өнгөрсөн 5-р сараас эхлэн 2300 гаруй бага насны хүүхдийг гэр бүлээс нь тусгаарлаж, эцэг эхийнх нь асуудлыг шийдэгдэх хүртэл түр орогнох байранд байрлуулж байсан нь олон улсын байгууллагууд болон олон нийтээс ихээхэн шүүмжлэл хүртээд байсан юм. Албан тушаалаа авснаас хойш цагаачдын асуудалд хатуу байр суурь баримталж буй Трампын уг шийдвэрт тэргүүн хатагтай Мелани нөлөө үзүүлсэн гэж эх сурвалжууд мэдээлж байна. 

Мөн АНУ НҮБ-ийн Хүний Эрхийн Зөвлөлөөс гарч, гишүүнчлэлээсээ татгалзаж байгаагаа зарлалаа. Израйлын асуудалд ялгавартай ханддаг, Саудын Араб, Венесуэл, Хятад зэрэг хүний эрхийн асуудал удаа дараа гаргадаг улсууд зөвлөлд багтсаар байгаа зэргийг тэд шалтаг болгон дурджээ. Хүний Эрхийн Зөвлөл нь 2006 онд байгуулагдсан бөгөөд 47 гишүүн улстай юм.