Трампыг дэмжигчид үймээн дэгдээж, Вашингтон хотод хөл хорио тогтоогоод байгаа билээ.
Үймээний улмаас Конгрессийн сонсголыг түр хойшлуулаад байсан юм.
Тэгвэл хэдхэн цагийн өмнөөс АНУ-ын хууль тогтоогчид Ерөнхийлөгчийн сонгуулийн дүнг баталгаажуулж, Жо Байденыг ялагчаар зарлах сонсголыг үргэлжлүүлж эхэлжээ.
Харин тус хотод үүссэн эмх замбараагүй байдалтай холбоотойгоор АНУ-ын Ерөнхийлөгч Дональд Трампын Фэйсбүүк хаягийг 24 цагийн хугацаатай хаалаа.
Фэйсбүүк компаниас "Трампын хуудаст хоёр ч удаа манай журамд нийцэхгүй зөрчил гарсан тул бид 24 цагийн хугацаатайгаар хаягийг нь хааж байна. Ингэснээр энэ хугацаанд цахим хуудастаа бичвэр оруулах боломжгүй болох юм" хэмээн мэдэгджээ.
Үүнээс өмнө Твиттер компани Трампын хаягийг 12 цагийн хугацаатай хаасан юм.
Харин араас нь Youtube, Инстаграмын хаягууд нь ч хаагджээ.
Ардчилсан намаас ялалт байгуулсан Жо Байден Ерөнхийлөгч Трампад хандан өргөсөн тангарагтаа үнэнч байж, үндсэн хуулиа хамгаалахыг шаардав.
Үймээний улмаас хүзүүндээ бууны шарх авсан байсан эмэгтэй нас баржээ.
