АН-ын төлөөлөл, УИХ-ын гишүүн Б.Пүрэвдорж өнөөдөр "Төрөөс төмөр замын талаар баримтлах бодлого"-ын хэрэгжилтийг хангах зарим арга хэмжээний тухай тогтоолын төслийг өргөн мэдүүлсэн талаар мэдээлэл хийлээ.

Тэрээр "Өнгөрсөн баасан гаригт миний бие УИХ-ын дарга Г.Занданшатарт Төмөр замын тогтоолын төслийг өргөн барьсан. Тэгэхээр Монгол Улс ямар царигтай байхыг Засгийн газрын өргөн барьснаар УИХ шийднэ гэсэн заалттай. Өнөөдрийг хүртэл уг тогтоолын төсөл бүрэн дүүрэн хэрэгжихгүй байна. Учир нь, УИХ-ын тогтоолгүй мөртлөө Тавантолгойгоос Гашуунсухайт хүртэл төмөр зам тавьчихсан. Энэ өргөн төмөр зам нь мухар болоод асуудал үүсгээд байна. Өргөн төмөр замаар бүтээгдэхүүн зөөлөө гэхэд дахиад нарийн царигтай төмөр зам тавихад 1.5 их наяд төгрөгийн хөрөнгө оруулалт шаардагдана. Тийм боломж байхгүй, тиймээс уул уурхайн ордоос тухайн улс нь ямар царигтай байна тэр царигийг барих тогтоолын төслийг өргөн барьсан" гэлээ.