Оюутолгойн гэрээг шалгасан УИХ дахь Ажлын хэсгийн дүгнэлт, Аудитын байгууллагаас Дубайн гэрээнд хийсэн шалгалт, АТГ-аас Оюутолгойн гэрээнд хийсэн шалгалт зэргийг УИХ хэлэлцэж, санал дүгнэлтээ гаргах учиртай. Гэвч Үндсэн хуулийн нэмэлт өөрчлөлтийн төсөл УИХ дээр орж ирсэн тул ажлын хэсгийн дүгнэлтийг хэлэлцэх эсэх нь тодорхойгүй болоод байна. Хэрэв өнөөдөр чуулганаар Үндсэн хуулийн нэмэлт өөрчлөлтийн төслийг хэлэлцэх нь зүйтэй гэж үзвэл УИХ үүнтэй зэрэгцүүлэн өөр бусад асуудлыг хэлэлцэх боломжгүй болох юм.
Гэвч энэ хооронд УИХ Оюутолгойн гэрээг шалгах хоёр дахь ажлыг хэсгийг байгуулжээ. Ажлын хэсэгт Эдийн засгийн байнгын хороо, Хууль зүйн байнгын хорооны гишүүд багтсан бөгөөд УИХ-ын гишүүн Б.Баттөмөр ахалж байна. Тэд Оюутолгойтой холбоотой шалгалтын дүгнэлтүүдийг нэгтгэж, парламентад танилцуулах үүрэгтэй. Өчигдөр АТГ-ын дарга З.Дашдаваа чуулганы хуралдаанд оролцох үеэрээ “Энэ сард багтан Оюутолгойн хэргийг шүүхийн байгууллагад шилжүүлнэ” гэв.
