Үндсэн хуулийн нэмэлт өөрчлөлтийн төслөөр Ард нийтийн санал асуулга явуулах тов, зардлын асуудлыг УИХ хэлэлцэж эхлээд байна.

Ард нийтийн санал асуулга явуулах тухай хуульд зааснаар УИХ Ард нийтийн санал асуулга явуулах шийдвэр гаргаснаас 21-45 хоногийн дотор ард нийтийн санал асуулга явуулах зохицуулалттай.

СЕХ-ны дарга Ч.Содномцэрэн энэ хугацааг тооцоод, мөн төсөв нь шийдэгдсэн тохиолдолд арваннэгдүгээр сарын дундуур ард нийтийн санал асуулга явуулах боломжтой гэдгийг ТББХ-ны хуралдаанд танилцууллаа.

СЕХ ард нийтийн санал асуулгад  12.5 тэрбум төгрөг зарцуулах санал оруулснаас гадна бүх шатанд санал асуулгыг зохион байгуулах Засаг даргын Тамгын газруудын зардал нэмэгдээд нийтдээ 29 тэрбум төгрөг зарцуулах тооцоо гарчээ.

Улсын бүртгэлийн ерөнхий газрын мэдээлснээр өнгөрөгч наймдугаар сарын байдлаар Монгол Улсад сонгуулийн насны хоёр сая 109 мянган иргэн бүртгэлтэй байжээ. Ирэх аравдугаар сар гэхэд энэ тоо хоёр сая 112 мянгад хүрэх юм байна.