Үндсэн хуулийн нэмэлт, өөрчлөлтийн төслийн хоёрдугаар хэлэлцүүлэг үргэлжилж байна. Өчигдөр чуулганы нэгдсэн хуралдааны дундуур УИХ дахь АН-ын зөвлөл завсарлага авч, ард нийтийн санал асуулга явуулах ёстой гэдэг эхний байр сууриа дахин нотолж буйгаа зөвлөлийн дарга Д.Эрдэнэбат мэдэгдсэн.

Харин УИХ дахь МАН-ын бүлэг өчигдөр орой хуралдаж Үндсэн хуулийн нэмэлт, өөрчлөлтийн эцсийн шийдийг ард түмнээсээ асуух нь зүйтэй гэдэг дээр санал нэгджээ.  

Үндсэн хуулийн нэмэлт, өөрчлөлтийн талаар ард нийтийн санал асуулга явуулах талаар цөөнхийн тавьсан шаардлагын хариуд Төрийн байгуулалтын Байнгын хорооны дарга С.Бямбацогт “Ард нийтийн санал асуулга явуулах асуудлыг Үндсэн хуульд нэмэлт, өөрчлөлт оруулах журмын тухай хуулийн дагуу хоёр дахь хэлэлцүүлгийн дараа шийднэ” хэмээн өнгөрсөн долоо хоногийн лхагва гаригт чуулганы нэгдсэн хуралдаан дээр мэдэгдсэн. 2010 онд батлагдсан Үндсэн хуульд нэмэлт, өөрчлөлт оруулах журмын тухай хуулийн дагуу Үндсэн хуулийн нэмэлт, өөрчлөлтийн хоёрдугаар хэлэлцүүлгийг хийж дууссаны дараа ард түмний санал асуулга явуулах эсэхийг УИХ шийдэх юм.