Өнгөрсөн даваа гаригт Оросын төв телевизийн сэтгүүлч Марина Овсянникова мэдээний цагаар Украины дайныг эсэргүүцэж буйгаа илэрхийлсэн билээ.
Тэрээр энэ зоригтой үйлдлийнхээ төлөө 30,000 рублийн торгуулиар шийтгүүлсэн байна. Мөн пүрэв гаригт France 24 сувагт ярилцлага өгөхдөө ажлаас гарах өргөдөл өгсөн тухайгаа хэлжээ.
Сэтгүүлч эмэгтэй ОХУ-д шинээр батлагдсан хуулийн дагуу дайны талаар худал мэдээ цацсан үндэслэлээр олон жилийн хорих ял сонсож магадгүй байгаа юм.
Харин Францын ерөнхийлөгч Эммануэл Макрон сэтгүүлч эмэгтэйг улс төрийн хамгаалалтад авч, оршин суух эрх олгох боломжтойгоо мэдэгджээ. Мөн тэрээр ОХУ-ын ерөнхийлөгч Владимир Путинтэй утсаар ярихдаа уг асуудлыг хөндөхөө амласан байна.
Сэтгүүлч Овсянникова бага насны хоёр хүүхэдтэй ч гадаадад цагаачлах бодолгүй байгаагаа хуваалцжээ. Гэр бүлээ хүнд байдалд орохыг мэдэж байсан ч тэрээр дайныг эсэргүүцсэн юм.
Энэ талаар Марина Овсянникова "Энэ дайныг цөмийн дайн болгож хувиргаж болохгүй. Ах дүүсийн хооронд эхэлсэн энэ дайныг зогсоох ёстой. Хүү минь том болоод намайг яагаад ийм үйлдэл хийснийг ойлгох байх гэж найдаж байна” гэсэн юм.
