БНХАУ-ын дарга Ши Жиньпин өчигдөр Хятадын үндэсний тэшүүрийн цэнгэлдэх хүрээлэн, Бээжингийн өвлийн олимпын бэлтгэл ажилтай танилцаж, олимпын хотхон, удирдлагын төв, мөсний сургалтын бааз зэрэг газруудаар зочилжээ.

Энэ үеэр БНХАУ-ын дарга тамирчин, дасгалжуулагч, менежер, үйлчилгээний ажилтнууд, шинжлэх ухааны судалгааны төвийн ажилтнууд, хэвлэл мэдээллийнхэн, сайн дурынхантай уулзаж, шинэ оны мэнд хүргэжээ.

Өвлийн олимпын XXIV дүгээр их наадам БНХАУ-ын нийслэл Бээжин хотноо ирэх хоёрдугаар сарын 4-нд эхлэх бөгөөд спортын 15 төрөлд 109 тэмцээн болох юм. Одоогийн байдлаар нийт гурван мянга орчим тамирчин оролцох төлөвлөгөөтэй байгаа аж.

Бээжин хот нь 2008 онд зуны олимпыг зохион байгуулж байсан туршлагатай. Мөн зуны олимп болж байсан хотод өвлийн олимп зохиогдох гэж буй нь анхны тохиолдол юм.

Олимп хоёрдугаар сарын 20-нд өндөрлөнө.