Польш улсын Ерөнхийлөгч Анджей Дуда баасан гаригт өгсөн шинжилгээний хариу эерэг гарч короноавирусийн халдвар авсан нь батлагджээ. Түүний биеийн байдал хэвийн, сайн байгаа гэж мэдээллээ.
Харин хэзээ халдвар авсан нь тодорхойгүй байна.
Польш улсад сүүлийн үед халдвар авсан хүний тоо огцом нэмэгдэж байгаа юм. Өнгөрсөн баасан гаригт халдварын 13600 тохиолдол шинээр бүртгэгдсэн нь цар тахал дэгдсэнээс хойш өдөрт бүртгэгдсэн хамгийн өндөр үзүүлэлт болжээ.
Польшийн Ерөнхийлөгч өнгөрсөн даваа гаригт Эстонийн нийслэл Таллин хотод болсон үйл ажиллагаанд оролцож Эстони, Болгарын Ерөнхийлөгч нартай уулзсан аж.
Ерөнхийлөгч Анджей Дуда өөрийн твиттер хуудаснаа “Миний биед халдварын ямар ч шинж тэмдэг илрээгүй. Гэвч шинжилгээний дүн бүх зүйлийг тодорхой болголоо. Миний биеийн байдал сайн байна. Ирэх өдрүүдэд өөрийгөө тусгаарлан ажил үүргээ алсаас гүйцэтгэнэ” гэж мэдээлжээ.
Тэрээр өдгөө 48 настай юм.
АНУ-ын Ерөнхийлөгч Дональд Трамп, Их Британийн Ерөнхий сайд Борис Жонсон тэргүүтэй “COVID-19”-ийн халдвар авсан дэлхийн удирдагчдын жагсаалтад Анджэй Дуда ийнхүү нэмэгдлээ.
