Батлан хамгаалахын салбарт олон зуун сая долларын үнийн дүн бүхий гэрээнүүд байгуулсан тухайгаа Польшийн засгийн газар мягмар гарагт мэдэгджээ.
2022 онд Орос-Украины дайн эхэлснээс хойш Польш улс цэргийн зардлаа эрс нэмэгдүүлж байгаа юм.
Кельц хотноо болж буй зэвсэг техникийн үзэсгэлэнгийн үеэр тус улсын батлан хамгаалахын сайд Владислав Косиняк-Камыш хэлэхдээ, засгийн газар 2 тэрбум орчим злот буюу 520 сая долларын үнийн дүн бүхий гэрээнүүд байгуулах гэж буйг дурдсан байна.
Түүний хэлснээр, Польшийн тал Испанийн нэгэн томоохон компанитай 1,1 тэрбум злотын үнийн дүн бүхий гэрээ байгуулж, нисэх онгоцны буудлуудын видео ажиглалтын систем худалдан авахаар төлөвлөж байгаа ажээ. Түүнчлэн мягмар гарагт цэргийн ложистик ба холбооны салбарт 3 гэрээ байгуулсан байна.
Одоогийн байдлаар Польш улс батлан хамгаалахын салбарт ДНБ-нийхээ 4 хувийг зарцуулж байгаа нь НАТО-гийн гишүүн орнуудын дотор хамгийн өндөр үзүүлэлт бөгөөд ирэх онд 4,7 хувьд хүргэхээр төлөвлөж байгаа ажээ.
Өнгөрсөн сард Польшийн тал Америкийн Боинг компаниас Apache загварын 96 байлдааны нисдэг тэргийг 10 тэрбум доллароор худалдан авч, Оросын Ми-24 нисдэг тэргүүдийг орлуулахаар шийдвэрлэжээ. Мөн хэдэн өдрийн өмнө хэдэн зуун ширхэг “агаар-агаар” ангиллын AIM-120C AMRAAM пуужингууд болон агаарын довтолгооноос хамгаалах Америкийн Patriot системд зориулан 48 ширхэг хөөргөх төхөөрөмжийг худалдан авна гэдгээ мэдэгдсэн байна.
Одоогийн байдлаар Польшийн зэвсэгт хүчний нийт бие бүрэлдэхүүний тоо 200 мянга байгаа нь НАТО-гийн эвслийн гишүүн улсуудын дотор АНУ ба Туркийн дараа орж байгаа бол Европын Холбооны хамгийн том арми болж байна.
