Монгол Улсын Ерөнхийлөгч У.Хүрэлсүх зарлиг гарган, Монгол, Австралийн харилцаа, хамтын ажиллагаанд оруулсан хувь нэмрийг нь өндрөөр үнэлж, Австралийн Элчин сайд Кэйти Смитийг “Найрамдал” медалиар шагнасан тухай албаны эх сурвалж мэдээлэв.

Ерөнхийлөгчийн Гадаад бодлогын зөвлөх Э.Одбаяр Элчин сайдыг эх орондоо бүрмөсөн буцахтай нь холбогдуулан хүлээн авч уулзах үеэр энэхүү шагналыг гардуулсан байна. Тэрбээр сүүлийн жилүүдэд хоёр орны хамтын ажиллагаа эрчимтэй өргөжиж буйд Элчин сайдын оролцоо чухал үүрэг гүйцэтгэсэн болохыг онцолжээ.

Элчин сайдын ажлын хугацаанд Монгол, Австралийн харилцаа улс төр, эдийн засаг, боловсрол, уул уурхай зэрэг олон салбарт гүнзгийрч, парламентын түвшинд ч идэвхтэй хамтын ажиллагаа өрнөсөн юм. Тухайлбал, Австралийн Сенатын танхимын Ерөнхийлөгч Сью Лаянсын Монгол Улсад хийсэн албан ёсны айлчлал нь хоёр орны хууль тогтоох байгууллагын уялдаа холбоог бататгасан чухал үйл явдал болсон гэдгийг тэмдэглэжээ.

Элчин сайд Кэйти Смит 2022 оны зургаадугаар сарын 27-нд Монгол Улсын Ерөнхийлөгчид Итгэмжлэх жуух бичгээ өргөн барьж, албан үүргээ хэрэгжүүлж эхэлсэн бөгөөд харилцан ашигтай, найрсаг хамтын ажиллагааг хөгжүүлэхийн төлөө тууштай ажилласнаа уулзалтын үеэр илэрхийлсэн байна.

Монгол Улс, Австралийн Холбооны Улс хооронд дипломат харилцаа 1972 оны есдүгээр сарын 15-нд тогтжээ.

Эх сурвалж: Монгол Улсын Ерөнхийлөгчийн Тамгын газар