УИХ-ын чуулганы нэгдсэн хуралдаанаар 2024 оны төсвийн тухай болон хамт өргөн мэдүүлсэн хуулийг хэлэлцэж байна.

Энэ үеэр УИХ-ын гишүүн Ж.Чинбүрэн "Монголд эмчилж чадахгүй хүүхдийн өвчнийг гадаадад эмчлүүлээд ирэхэд нь төрөөс бүрэн даах боломжтой. Үүнийг Эрүүл мэндийн даатгалын үндэсний зөвлөлөөс ажил хэрэг болгож байгаа юу. Монголд эмчилж чадахгүй гэсэн тохиолдолд төр заавал даах ёстой. Жилд 10 тэрбумаас хэтрэхгүй зардал байх гээд байна. Та Эрүүл мэндийн даатгалын үндэсний зөвлөлийн даргын хувьд үүнийг Даатгалын үндэсний зөвлөлийнхөө шийдвэрээр хийх боломжтой. Зарим үнийн тарифыг зохицуулснаар шийдэх боломж байгаа. Мөн эмч, эмнэлгийн байгууллагуудаа сургах асуудалд илүү анхаараасай гэж хүсэж байна" гэлээ.

Харин Эрүүл мэндийн сайд С.Чинзориг "Дотооддоо эмчилж чадахгүй байгаа 27 төрлийн өвчин байна гэсэн Эрүүл мэндийн сайдын тушаал байдаг юм билээ. Үүнтэй холбоотойгоор 2024 оны улсын төсөв бодлогын өөрчлөлт оруулж байгаа зүйлс бий.

Засгийн газрын тусгай сангийн тухай хуульд өөрчлөлт оруулах асуудлыг УИХ-д өргөн барьсан. Хуульд өөрчлөлт оруулаад Эрүүл мэндийг дэмжих сангийн хөрөнгийг зөвхөн нийгмийн эрүүл мэндийн асуудалд зарцуулж байгааг эмнэлгийн тусламж үйлчилгээнд зарцуулдаг болгож хамрах хүрээг нь өргөжүүлэх өөрчлөлт хуульд орж байгаа" гэлээ.