2024 оны төсвийн төсөлд чуулганы болон хуралдааны танхимыг 126 гишүүнд зориулан засаж, тохижуулахад 22.08 тэрбум төгрөг төсөвлөсөн байсан.
Мөн төрийн ордны хуралдааны танхимуудын их засварын ажилд 3.089 тэрбум төгрөг, тоног төхөөрөмж худалдан авахад 19 тэрбум төгрөг тусгажээ.
Энэ талаар УИХ-ын дарга Г.Занданшатар "УИХ-ын гишүүдийн тоо 126 болсонтой холбогдуулан зардал шууд нэмсэн асуудал байхгүй. УИХ-ын чуулганы хуралдааны сандал ширээний тоо 50-аар нэмэгдэнэ. Сая Лаосын парламентын дарга манай улсад ажиллахдаа 50 ширээ сандал бэлэглэхээр болсон. Энэхүү 22 тэрбумын төсөв нь микрофон, цахим системийг шинэчлэхэд зориулагдах юм. Одоо байгаа микрофон, цахим системийг өмнө нь КОЙКА-ийн тусламжаар хийгдсэн. Үүний хугацаа нь дууссан, бүтээгдэхүүн нь байхгүй, шинэчлэх боломжгүй болсон юм. Иймд цахим системийг шинэчлэхэд төсөвт тусгагдсан. Энэ бол парламент нээлттэй, ил тод байхад зориулагдсан цахим систем, тоног төхөөрөмжийн төсөв юм. Олон улсад байнгын хорооны хуралдааныг популизмгүй, ажил хэрэгч явуулахын тулд хаалттай байдаг. Харин манайх бол нээлттэй парламент учир бүх байнгын хороо, чуулганы нэгдсэн хуралдаан нээлттэй. Энэ утгаараа шинэчлэхээр төсөвт тусгасан" гэлээ.
