Их Британийн Ерөнхий сайд асан Лиз Трасс ирэх долоо хоногт Тайваньд айлчлахаар болжээ. Түүнийг тавдугаар сарын 16-наас 20-ны өдрүүдэд айлчлал хийх гэж байгааг Тайванийн Гадаад Яамнаас мэдээлсэн байна.

Лиз Трасс айлчлалынхаа үеэр, Тайванийн өндөр албаныхантай уулзаж, тавдугаар сарын 17-нд Тайванийн томоохон судалгааны хүрээлэнгээс зохион байгуулах арга хэмжээнд үг хэлэхээр төлөвлөжээ. Тус судалгааны хүрээлэн нь салан тусгаарлах үзлийг сурталчилж, “Нэг Хятад” зарчмыг зөрчсөн үндэслэлээр өнгөрөгч дөрөвдүгээр сард Бээжингийн хар жагсаалтад орсон байгууллага юм байна.

Мөн Тайванийн Ерөнхийлөгч Цай Инвэнтэй уулзах товтой байгаа талаар Лиз Трассын ажлын албанаас мэдээлсэн байна. Улмаар тэр 1996 онд болсон Маргарет Тэтчерийн айлчлалаас хойш Тайваньд хөл тавьсан Их Британийн ерөнхий сайдын албыг хашиж байсан анхны улстөрч болох юм байна. Хятадын талаар хатуу байр суурь баримталдаг гэдгээрээ нэртэй энэ улстөрч өнгөрсөн оны аравдугаар сард огцорсныхоо дараа Япон болон АНУ-д очиж, Бээжингийн талаар хатуу байр суурьтай байхад уриалж байжээ.

Түүний халааг авсан Ерөнхий сайд Риши Сунак харин, далай дахь үйл ажиллагаа болон хүний эрхийн талаарх бодлогуудаа өөрчлөхийг уриалах замаар Хятадтай харилцаагаа үргэлжлүүлэх төлөвлөгөөтэй байна. Харин Лиз Трасс Тайваньд айлчилбал Их Британи, Хятадын харилцаанд асуудал үүсгэж болзошгүй гэдгийг шинжээчид тэмдэглэж байна. Одоогийн байдлаар, британийн парламентын Төлөөлөгчдийн танхимын жирийн гишүүний статустай энэ улстөрч гадаад бодлогын асуудлууд болон хэт зүүний үзэл баримтлалуудыг шүүмжлэх замаар улстөрийн замналаа сэргээхийг чармайж байна гэж “Гардиан” сонинд бичжээ.

Лиз Трасс Британийн Ерөнхий сайдын албыг сар хагас орчим хашсаныхаа дараа өнгөрсөн оны аравдугаар сард, өөрийнх нь дэвшүүлсэн эдийн засгийн төлөвлөгөө зах зээлд дээр савлагаа үймээн үүсгэсний улмаас огцорч байсныг мөн хэвлэлүүд дурдсан байна.