Хятадын тэрбумтан, Алибабагийн үүсгэн байгуулагч Жэк Ма гадаад улсад олны нүднээс нуугдан амьдарч байгаад төрөлх Ханьжоу хотдоо буцаж иржээ.
Тэрээр 2020 оны аравдугаар сард болсон нэгэн арга хэмжээний үеэр эрх баригчдын санхүүгийн зохицуулалттай холбоотой бодлогыг шүүмжилснээсээ хойш алга болсон юм.
Тэрээр Хонконгоор дайран Хятад руу буцаж очсон байна.
Жак Ма өчигдөр Ханьжоу хотын нэгэн сургуульд зочлохдоо хиймэл оюуны технологи боловсролын салбарт хэрхэн нөлөөлөх талаар илтгэл тавьжээ.
Хятадын тэргүүн баян байсан Жэк Ма өнгөрсөн нэгдүгээр сард өөрийн байгуулсан санхүүгийн технологийн Ант Группийн хяналтын хувь эзэмшлээсээ татгалзсан юм. Түүний энэ үйлдлийг хэт хүчирхэгжихээс болгоомжилсон Хятадын Коммунист Намын авсан ээлжит арга хэмжээ гэж таамаглаж буй.
Өнгөрсөн хоёр жил хагас орчим хугацаанд Хятадын эрх баригчид Алибаба болон Ант Группийн зах зээлийн давуу байдлыг хязгаарлах хэд хэдэн арга хэмжээ авсан байдаг.
