Дэлхийн тэргүүн баячуудын нэг Элон Маск дэлхийн хамгийн нөлөө бүхий олон нийтийн мэдээллийн хэрэгслийн нэг болох “Твиттер” компанийг удирдахаар болжээ. Энэ тухай CNN дүрэв гаригт мэдээлсэн байна. Тэрбумтан Элон Маск “Твиттер” компанийг 44 тэрбум америк доллараар худалдан авсан байна. Гэвч энэ үйл явц тийм хялбар байсангүй.

Элон Маск худалдааны хэлэлцээний явцад тавьсан саналаа цуцлахаар шийдсэний улмаас “Твиттер” компани үүнтэй холбогдуулан шүүхэд хандаж байв. Делавэрийн шүүхээс талуудад аравдугаар сарын 28-ныг хүртэл наймаагаа дуусгах, эсвэл шүүхээр маргаанаа шийдвэрлүүлэх сонголтыг тулгасан юм.

Сан-Франциско хотод төвтэй “Твиттер” компанийн эзэмшигч болсон Элон Маск платформоо хуурамч хэрэглэгчдээс цэвэрлэж, үг хэлэх эрх чөлөөг зөрчихгүй байхаар "Твиттер"-ийн контентыг зохицуулах бодлогыг эргэн харж, дахин төлөвлөж байгаагаа мэдэгдэв. АНУ-ын Ерөнхийлөгч асан Дональд Трампын хаягийг дахин сэргээнэ гэж амласан байна. Энэ нь АНУ-ын 2024 оны Ерөнхийлөгчийн сонгуулийн кампанит ажилд томоохон нөлөө үзүүлж магадгүй гэж мэргэжилтнүүд үзэж байгаа юм.

Мөн Элон Маск "Твиттер"-ийг худалдан авснаар тус компани нь нээлттэй байхаа больж, нэг хүний эзэмшилд шилжсэн төдийгүй ажилчдын дунд цомхотгол хийсэн байна. CNN-ийн мэдээлснээр компанийн гүйцэтгэх захирал Параг Агравал болон бусад хоёр удирдах албан тушаалтныг ажлаас нь чөлөөлжээ. Гэвч компани энэ талаар ямар нэг тайлбар өгөхөөс татгалзсан байна.

Дэлхийн тэргүүн баячуудын нэг Элон Маск “Tвиттер” компанийг бүрэн худалдаж авсныхаа дараа ажилчдынх нь ихэнх хувийг цомхотгохоор төлөвлөсөн тухай "Вашингтон пост" сонин болон бусад хэвлэлүүд мэдээлж байсан юм.