Ойн гал түймэр нь дэлхийн хамгийн их тархалттай үзэгдэл болоод байна. Ойт хээрийн түймэр хорин жилийн өмнөхөөс хоёр дахин их ойг шатааж байгаа тухай Мэрилендын их сургуулийн Дэлхийн байгалийн нөөц хүрээлэнгийн "Бүх дэлхийн ойн манаа" судалгаанаас иш татан хэвлэлээр бичиж байна.

"Ойн түймэр нь илүү ихээр тархсан үзэгдэл болон 20 жилийн өмнөхөөс ойролцоогоор хоёр дахин их ойг галдаж байна" хэмээн судалгаанд өгүүлжээ.

Одоо ойн түймэр жил бүр ойролцоогоор гурван сая га ойг 2001 оныхоос илүүтэйгээр шатааж байгаа нь Бельги улсын газар нутгийн хэмжээтэй ижил болж байна. Ихэнхи түймэр Орос, Канад, Аляскийн нутаг дэвсгээр тархсан шилмүүст ойг галдаж байгаа юм.

Уур амьсгалын дулаарлын улмаас гэж шинжээчид үүний шалтгааныг тайлбарлаж байна. Ойн мөхлийг зогсоохын тулд мод огтлолтыг зогсоож, ган гачигтай үед ойд хяналт илүү их хяналт тавьж, гал гаргахыг болих хэрэгтэй гэж зөвлөж байна.

М.ЦОГТ