Орос, Украины дайн олон орны удирдагчдын үзэл бодлыг өөрчилж байна.  

Швед улс дэлхийн II дугаар дайнаас хойш төвийг сахих байр суурь баримталж ирсэн бөгөөд сүүлийн зуу гаруй жилийн турш ямар нэг цэргийн эвсэлд нэгдэж байгаагүй билээ. Тэгвэл өчигдөр Швед улсын засгийн газар Умард Атлантын Цэргийн Эвсэл буюу НАТО-д гишүүнээр элсэх шийдвэрээ зарлажээ. Мөн энэ өдөр Финланд улс тус эвсэлд элсэх шийдвэрээ эцэслэн зарласан юм.

Финляндын ерөнхий сайд Санна Марин "Финляндын аюулгүй байдал, Балтийн тэнгисийн бүс нутаг, Хойд Европын тогтвортой байдал, аюулгүй байдлыг нэмэгдүүлэх болно" гэж ард түмэндээ хандан мэдэгдэл хийлээ.

Харин Швед улсын ерөнхий сайд Магдалена Андерссон "Шведийн ард түмний аюулгүй байдлыг хангах хамгийн зөв шийдэл. Цэргийн эвсэлд үл нэгдэх бодлого нь Швед улсад үүргээ сайн гүйцэтгэсэн, харин ирээдүйд ийм байх боломжгүй" гэж хэлжээ.

Шведийн засгийн газар өөрийн улсын газар нутагт цөмийн зэвсэг байрлуулахгүй, цэргийн бааз байгуулахгүй гэсэн нөхцөлтэйгөөр НАТО-д элсэхээр төлөвлөсөн байна.

Финланд улс ОХУ-тай 1,300 км шугамаар хиллэдэг бол Швед улс шууд хил залгадаггүй.