Монгол Улсын гавьяат жүжигчин, Улсын манлай засуул, Улсын бөх цоллогч, Монголын уртын дууны холбооны тэргүүн, уртын дууч, морин хуурч, ерөөлч, магтаалч Баасанхүүгийн Батболд 2022 оны наймдугаар сарын 28-ны өдөр нас нөгчиж, бид бүхэнд нөхөж баршгүй хүнд гарз тохиолоо.

Тэрээр Говь-Алтай аймгийн Тонхил сумд 1972 онд төрсөн. 1991 онд Соёлын дунд сургууль, 1996 онд Соёл урлагийн их сургуулийн уртын дууны анги төгссөн, мэргэжлийн дуучин. Улсын ардын дуу бүжгийн чуулга, Улаанбаатар чуулгад дуучин, Соёл урлагийн их сургуульд багшаар олон жил ажилласан.

Мөн залуу хойч үеэ уйгагүй бэлдэж, Үндэсний бөхийн засуулуудад бөхийн цол дуудах арга барил, эрдмийг өөрийн санаачилгаар зааж сургаж ирсэн төдийгүй уртын дууны "Өнө" чуулгыг санаачлан байгуулж, ард олонд уртын дуугаа сургах, сурталчлан хүргэх, түгээх ажлыг нэр төртэй хийж байв.

Б.Батболд нь 1994 оноос засуулаар ажиллаж, зүүн, баруун талын магнай, дагавар магнайн бөхчүүдийг өнөө хүртэл цоллож ирсэн алдартай засуул, түмэн олныхоо дунд нэр хүндтэй нэгэн байлаа. Тиймдээ ч монголын засуулуудын дундаас хамгийн анх "Улсын манлай засуул" зэрэг дэв хүртсэн билээ.

Талийгаачийн ажилсаг хичээнгүй, төлөв даруу, түвшин сайхан чанар, гэгээн дүр төрх бид бүхний сэтгэлд үүрд хоногшин үлдэх болно.

Гэр бүл, үр хүүхэд, ахан дүүс, анд нөхдөд нь гүн эмгэнэл илэрхийлье.

МОНГОЛЫН ҮНДЭСНИЙ БӨХИЙН ХОЛБОО