Хичээлийн шинэ жил эхлэх гэж буйтай холбогдуулан автомашинуудыг улсын дугаарын тэгш, сондгойгоор замын хөдөлгөөнд оролцуулахаар болсон. Энэхүү зохицуулалт Наймдугаар сарын 27-ноос Есдүгээр сарын 3-ны өдрийг дуустал 08:00-20:00 цагийн хооронд үйлчлэх юм. Үүнтэй холбоотойгоор нийтийн тээврийн ачаалал нэмэгдэхээр байгаа. Үүнийг хэрхэн зохицуулах талаар Хотын даргын хэвлэлийн төлөөлөгч Н.Сугар мэдээлэл өглөө.
Тэрээр "Нэг чиглэлд хэдий хэр ачаалал үүсэхийг тооцоолоод зохицуулалт хийгээд явах боломжтой. Мөн иргэд нийтийн тээврээс гадна "car sharing" үйлчилгээг нэвтрүүлэх шаардлагатай байна. Нэг байгууллагын нэг зүгт гэртэй хүмүүс машиндаа хамт зорчих энэхүү үйлчилгээг дэлхийн олон улсад нэвтрүүлсэн байдаг. Улаанбаатар хотын иргэд энэ соёлд суралцахад зүгээр болов уу гэсэн зөвлөмж бий. Орон нутгаас 100 мянга орчим тээврийн хэрэгсэл богино хугацаанд орж ирдэг учир түр хугацаанд авч хэрэгжүүлж буй арга хэмжээ" гэв.
