Европын бизнес клубийн гишүүд буюу Польшийн бизнес эрхлэгчид Улаанбаатар хотод дөрөвдүгээр сарын 5-10-ны өдрүүдэд айлчлах гэж байна. 

Энэ талаар Нийслэлийн Засаг даргын орлогч Ж.Сандагсүрэн Бүгд Найрамдах Польш улсаас Монгол улсад суугаа Онц бөгөөд Бүрэн эрхт Элчин сайд Кшиштоф Бойког хүлээн авч уулзаж, санал солилцсон юм.

Айлчлалын бүрэлдэхүүнд барилга, барилгын зураг төсөл болон жижиг онгоц үйлдвэрлэлийн салбарын төлөөлөл багтжээ.

Үүнтэй холбогдуулан нийслэлийн зүгээс МҮХАҮТ, Улаанбаатар хотын худалдааны танхим, Улаанбаатар хөгжлийн корпораци ХК, Улаанбаатар хөрөнгө оруулалт, менежмент ХХК зэрэг байгууллагуудтай уулзалт зохион байгуулахаар төлөвлөж байна.

Польш улсын эдийн засгийн 70-80 орчим хувийг хувийн хэвшил авч явдаг байна. Сүүлийн хоёр жил гаруйн хугацаанд хоёр улсын хооронд эдийн засгийн уулзалт хийгдээгүй байсан юм. Тиймээс энэ удаагийн уулзалтыг бизнес эрхлэгчдийн хамтын ажиллагаанд тодорхой үр өгөөжтэй байлгахын тулд нийслэлээс шалтгаалах бүх зүйлд хамтран ажиллахад бэлэн гэдгээ илэрхийллээ.