Өчигдөр Канад болон Австрали улс коронавирусийн улмаас Токио-2020 олимпод оролцохгүй, тамирчдаа илгээхгүй гэдгээ мэдэгдсэн юм. Харин Их Британи улс “Манай улс тамирчдаа Токиогийн Олимпод оролцуулах бодолгүй байна” гэж Олимпын хорооны тэргүүн мэдэгджээ.

Тус улсууд олимпын наадмыг 2021 онд зохион байгуулахыг хүсч буйгаа илэрхийлжээ.

Тэгвэл Олон Улсын Олимпын Хороо долдугаар сард зохион байгуулагдах Токио 2020 зуны олимпын наадмыг хойшлуулах шийдвэр гаргажээ. 

Энэ талаар ОУОХ-ны гишүүн Дик Паунд “ОУОХ-ноос авсан мэдээллээр бол хойшлох шийдвэр гарсан байна. Тодорхой шийдвэрүүд хараахан гараагүй байгаа хэдий ч миний мэдэж байгаагаар Олимп долдугаар сарын 24-нд эхлэхгүй болсон” гэжээ.

Тэрээр мөн зуны олимпын наадмыг нэг жилээр хойшлуулах нь хамгийн зөв шийдэл гэж үзэж байгаагаа илэрхийлсэн байна.

Түүний хэлснээр зуны Олимпын наадмыг хэзээ зохион байгуулах асуудлыг дөрвөн долоо хоногийн хугацаанд шийдвэрлэхээр болсон ч уг шийдвэрийг ойрын хугацаанд танилцуулах төлөвтэй байгаа ажээ. 

ОУОХ болон Япон улсын засгийн газар Токио 2020 олимпын наадмыг хугацаанд нь явуулахаа олон удаа мэдэгдэж байсан ч үндэсний олимпын хороод, спортын холбоод, тамирчдын шахалтаар хойшлуулах асуудлыг нэг сарын дотор ярилцаж шийдэхээр болоод байсан.

Олимпын наадам 124 жилийн түүхэндээ ганц ч удаа хойшлогдож байгаагүй бөгөөд 1916, 1940, 1944 онуудад дэлхийн дайнуудын улмаас бүрмөсөн цуцлагдаж байжээ.

Олимпын наадам хойшилбол зохион байгуулагч оронд том цохилт болох юм. Япон улс энэ арга хэмжээнд $12 тэрбумын хөрөнгө оруулаад байгаа билээ.